الناس اللي اتربت في بيوت مصرية عادية 160م مربع بالكتير
اللي دخلوا مدارس لغات أو تجريبية مصاريفها بالكتير 1000 جنيه في السنة
لما كان أقصى طموح لينا كأسره هي خروجة Wimpy
لما كان المصيف ال Cool الوحيد هو العجمي بيطاش، وشاطئ بيانكي اللي كان بيضم أحلى بنات مصر، وخروب كلية الطب وشارع الحنفية
لما كان الفجور انك تروح تسهر في ديسكو سمرمون في العجمي
لما كان فيلم الكاميرا 24 أو 36 صورة، ونصه بيتحرق علشان الضلمة
وكان كل يوم الخميس بالنسبة لنا عيد
أيام كمبيوتر صخر والديسكات 3.5 بوصة
وأفلام السينما للبنات : Pretty Woman – Scent Of a Woman
وأفلام السينما للولاد : Rocky 4 – Commando - لا تراجع ولا استسلام لفان دام
أيام التليفون اللي بقرص
والعيلة الجامدة عندها تليفون تاني بسماعة لاسلكي وده عادة في غرفة نوم بابا وماما
ولما يجي تليفون انت مستنيه يبقى كل همك تعرف إذا كانت ماما رافعة السماعة من جوه ولا لأ
ولما كنا بنزهق واحنا في البيت فنتصل ب 15 علشان ترد علينا الست بتاعت "الساعة الآن السادسة وخمس وعشرون دقيقة وثلاثون ثانية"
نقوم جايين قافلين ومتصلين تاني بسرعة نلاقي الفرق 10 ثواني بين المرتين
لما كنت تحب تبعت صورة لعمك اللي في ألمانيا تحطها في جواب يوصل بعد 3 أسابيع
لما كان أي حد بيجي من السفر العيلة كلها تطلع على المطار قبل ميعاد الوصول بساعتين
لما كانت الكوكاكولا بـ 15 قرش والبوزو بـ 5 قروش وكان المصروف اليومي ربع جنيه
أيام اللبان السحري اللي بيتغير لونة في البؤ
أيام الجينس الليفيز 501 لما كان في عزه
أيام الـ سكوبي دو وأحلى مادليات يدوية
أيام الدروس الخصوصية أم 20 جنيه في الحصة
أيام حميد الشاعري وانه كل سنة يطلعنا مغني جديد
أيام شرائط كاسيت لقاء النجوم وهاي كواليتي
كانت أصيع أغنية عندنا "ايه الأسا توك ده" لحمدي بتشان يااااااااااه يا حمدي:)
أيام اخترنا لك كل يوم أربع ونادي السينما يوم السبت
و عالم البحار – أماني وأغاني – سر الأرض – الكاميرا في الملعب – عالم الحيوان
أيام لما كانوا أهالينا بيسافروا بورسعيد يجيبوا علب الكونبوت المشكل وأزايز الشامبوه
أيام فرحتنا بوصول مصر كأس العالم سنة 90 وطبعا بجول مجدي عبد الغني
أيام أول موبايل Nokia سنة 1996 وخط الموبايل لما كان 1700 جنيه
والله عيشنا أيام حلوة برده وكنا راضيين باللي معانا
صباح الفل
ليست هناك تعليقات