علشان شوية البوستات الجميله بتاعة الحياه الورديه والطب هو مهنه انسانيه

Share:
11111111
بص يا نجم بص يا باشا
علشان شوية البوستات الجميله بتاعة الحياه الورديه والطب هو مهنه انسانيه والدكتور فلان الله يكرمه وهو ده الانسان بجد لان كشفه لسه سته جنيه ومش سفاح وي بقية الاطباء سفاحين ويارب تتعلموا الانسانيه


وان الاطباء دول بقوا وحشين اووي علشان بيزودوا الفيزيتا وبياخدوا فلوس وجبنه نستو
احب اوضح شوية حاجات كدا بسرعه في اد عشرين تلاتين سطر
بص يا نجم الطبيب اللي مش عاجبك ده دخل كليه ست سنين منهم سنه سته 14 شهر وبعدين قعد يتمرمط 12 شهر امتياز بمكافاءة 280 جنيه اليومين دولة، علي ايامي كانوا 141 وشلن والله العظيم وشلن وكانوا بيدهملنا كدا
وبعدين اتص سنه او 3 سنين جيش وبعدين بقي طبيب مقيم في مستشفي حكومي اتعرض لقلة ادب وبلطجه ونوبتجيات 24 ساعه وساعات 36 متواصله
نوبتجيات عيد ووقفه عرفه وعيد صغير وعيد كبير وعدي عليه صيف واتنين وتلاته واربعه بيسف تراب الاستقبال وانت سيادتك بتصيف في مارينا او شرم او جمصه وهو قاعد في الرعايه او بيولد مراتك مجانا او بيجبس واحد بلطجي ضارب ترامادول بعد ما اتخانق مع الديلير بتاعه والديلر دخل في غيبوبه وزميله قاعد جنبه في الرعايه بعد ما رجالة الجراحه شالوله الطحال بعد ما اتشق بالموس
وبعدين راح يسجل ماجستير قالوله ما فيش السنه دي وراح تاني قالوله خد دبلومه وراح تالت قالوله ماشي ادفع يعني شخلل ودخل فيرست وانت لسه بتصيف وبدأ رساله وانت لسه بتصيف واتعك في الرساله علشان الباشا الاستاذ مش عاجبه شكله
ودخل السكند فسقط واتبهدل في الشفوي وبعد اما نجح من المره التالته ولا الرابعه بدأ رحلة كفاح علشان يخلص رسالة الماجستير لانه معهوش 10 الاف علشان الكيتس
ولا 3000 مصاريف سنويه وابوه الله يرحمه مات وسابه مش لاقي حد يصرف عليه وبعد اما خلص الرساله رفضوا يناقشوله الرساله الا بعد اما يشخلل

وبعد كل ده وهو بيقبض من الحكومه 1700 جنيه
بص يا سيدي
احنا لا بنعرف نعمل بزينس ولا بنبيع بالمتر ولا بنقسم اراضي ولا بنتاجر في الشقق ولا عندنا محل عطور ولا عندنا محلات دهب ولا ينفع نبقي جزارين ولا مشاركين في قريه سياحيه ولا بنشتغل في السمسره ولا عندنا كوفي شوف في جامعة الدول ولا عندنا بابي ولا مامي
احنا اكل عيشنا هو الطب
يعني اكل عيشنا الطب
انا شخصيا مستعد اشتغل بالمجان بس سيادتك وفرلي لحمه وفراخ وزيت وسكر وبامبرز للعيال ولبن وبنزين ومواصله مجانيه ودهب للعروسه مجاني واما اروح اصيف لاول مره بعد 15 سنه شقي يبقي ليا حجز مجاني واما احب البس او اجيب لبس للعيال يبقي مجاني وياريت الفرن اللي جنب بيتنا يبعتي كل يوم عيش بلدي يكفينا
انا عاوز المدارس الخاصه تبقي بالمجان زي شغلي والعيال ولادي المدرسين ييجوا البيت للدرس الخصوصي بالمجان
وياريت محصل الكهربا والميه والغاز يعرف انها شقة دكتور فيكتب وصل مجاني

يارب تكون المعلومه وصلت
يمكن الشير
د.وليد جابر القزاز

ليست هناك تعليقات