لية تذكرة المترو لازم يزيد سعرها ؟! تعالوا معايا واحده واحده كده نحسبها بالأرقام ...

Share:
11111111

عدد القطارات في الثلاث خطوط لا يزيد عن 100 قطار.
عدد محطات الخط الأول 35 محطه.
عدد محطات الخط الثاني 20 محطه.
عدد محطات الخط الثالث 9 محطات
لية تذكرة المترو لازم يزيد سعرها ؟! تعالوا معايا واحده واحده كده نحسبها بالأرقام ...
.
و يعمل بالمترو ما يقرب من 6000 عامل وموظف في الثلاث خطوط.



متوسط دخل المترو في اليوم الواحد 2 مليون جنيه ونصف.
يعني في الشهر حوالي 80 مليون جنيه.



لو فرضنا إن الـ 6000 عامل وموظف مرتبهم 5 ألاف جنيه كل واحد في الشهر.
هيكون مجموع المرتبات 30 مليون جنيه في الشهر.

----------------------

بيتم عمل صيانه للمترو كل اسبوعين علي 9 قطارات فقط.
يعني في الشهر بيعملوا صيانه لـ 18 قطار فقط.
ولو فرضنا إن صيانة القطر الواحد بتكلف 100 ألف جنيه بحد أقصي وخيالي.
هيكون مجموع صيانات الـ 18 قطار في الشهر مليون و800 ألف جنيه.
نقول 2 مليون والـ 200 ألف الفكه نعتبرهم بقشيش.

------------

ونقول كمان 2 مليون جنيه لصيانة خطوط المترو.
ونقول كمان 2 مليون لصيانة الشبكة الكهربائيه المغذيه للمترو.
ونقول عندنا 64 محطه في الثلاث خطوط بيتعملهم صيانه بـ 10 مليون في الشهر " وده ما بيحصلش طبعا " بس عادي يعني خلينا نتخيل.

--------

شركة الأمن والنظافه اللي ماسكه المترو مش هقول ان أسمها كوين سيرفس ومش هقول إنها ملك الجيش :D
ومش هقول إنها مشغله عمال نظافه متسولين في المترو " هذه ليست سخرية ولهم كل الاحترام والتقدير " لأن مرتباتهم معدومه .
موظف الأمن مرتبه حوالي 925 جنيه.
موظف النظافه متبه والي 825 جنيه.
وعندنا 64 محطه ...
نقول كل محطه فيها بحد أقصي 10 موظفين أمن و 10 عمال نظافه.
10 موظفين أمن مجموع مرتبهم هيبقي 9250 جنيه .. قول 10 ألاف جنيه
10 عمال نظافه مجموع مرتبهم هيبقي 8250 جنيه .. نقول برضوة 10 ألاف جنيه.
يعني 20 ألف جنيه مجموع مرتب عمال النظافة وموظفين الأمن في المحطه الواحده.
نضربهم في 64 محطه في الثلاث خطوط يبقي الناتج بتاعهم مليون و280 ألف جنيه.
ونقول شركه كوين سيرفيس بتاخد ضعفهم 3 مرات يبقي 3 مليون و480 ألف جنيه.
يبقي إجمالي الفلوس اللي بتروح لشركه كوين سيرفيس للأمن والنظافه 5 مليون و 120 ألف جنيه .. قول يا عم 6 مليون جنيه في الشهر.

------------

ومش هنتكلم علي الغرامات اللي بتتحصل كل يوم من المحطات بالألوفات !!
وبرضوة مش هنتكلم عن إيجار المحلات والأكشاك داخل محطات المترو اللي أقل إيجار فيهم بيكون حوالي 5 ألاف جنيه !!
ومش هنتكلم برضوة عن ماكينات الـ ATM المنتشرة في المحطات واللي البنوك بتدفع إيجار شهري ليها !!
ومش هتكلم علي الإعلانات مدفوعة الأجر اللي علي جدرات المحطات وعلي عربات المترو !!



نجمع بقي مصاريف المترو الشهريه ..
30 مليون جنيه مرتبات شهريه لـ 6000 عامل وموظف في الثلاث خطوط.
2 مليون جنيه صيانة 18 قطارفي الشهر.
2 مليون جنيه صيانة خطوط المترو في الشهر.
2 مليون جنيه صيانة شبكة الكهرباء المغذيه للمتروفي الشهر.
10 مليون جنيه صيانة 64 محطه شهريا.
6 مليون جنيه لشركة كوين سيرفيس في الشهر.

الإجمالي 52 مليون جنيه في الشهر.
ونحط 8 مليون جنيه طوارئ.
يبقي الإجمالي 60 مليون جنيه في الشهر.

هيتبقي كده 20 مليون جنيه صافي أرباح للمترو في الشهر الواحد.
اللي بيقولوا انه بيخسر وهيغلوا تمن التذكرة !!

------------

وبالنسبة للناس اللي هتقول انه في توسعات في المترو وخطوط جديده بتتعمل وقطارات جديده بيشتروها .. أحب أقولك إن معظم الحاجات ديه بتجيلنا معونات من برة ببلاش.
ولو مبتجيش ببلاش اضرب الـ 20 مليون في السنه هتبقي 240 مليون في السنه
ده لو ما اتحطوش في بنك وجابوا ارباح بالملالين في السنه !!
أضربهم بقي في عدد السنين اللي مكنش فيها تجديد للمترو ولا توسعات ولا خطوط جديده وهتلاقي الارقام تغطي تكلفه انشاء الخطوط الثلاثه وهتفيض كمان !!



لو أنتوا شايفين إن الكلام ده مبالغ فيه ممكن تطلبوا من الحكومه ميزانية المترو اللي المفروض اصلا انهم بيكونوا بيعلنوها للناس علشان يقنعوا الناس إنه بيخسر !!

#أعلنوا_ميزانية_المترو
#لا_لزيادة_تذكرة_المترو

ليست هناك تعليقات