للمصريين تفاصيل السفر الى المانيا من الالف الى الياء

Share:
11111111
  السفر والدراسة في المانيا .
بدون الدخول في تفاصيل تجربتي الشخصية الموضوع كالاتي عايز تسافر المانيا تدرس لازم يكون معاك الماني وضمان مالي من اهلك طيب ايه التفاصيل
مبدأيا التعليم في جامعات المانيا مجاني بمعني كلمة مجاني والطالب بيتحمل بس مصاريف معيشته اكل وشرب وسكن ومصاريفه الشخصية مش اكتر بالعكس كمان الجامعة عاملة زي مصاريف رمزية حوالي 250 يورو كل ست شهور ودي مش

للجامعة دي بيتعمل بيها تذكرة للمواصلات في الولاية اللي انت عايش فيها ودي بتوفر كتير جدا جدا لان المواصلات هنا غالية جدا طيب نيجي بقى الاول لموضوع اللغه علشان تدرس في جامعات المانيا لازم يكون معاك شهادة DSH مستوى 3 او 2 على الاقل ودي شهادة بتعادل1 c وده احد مستويات اللغه الالمانية العقبة دي بتتغلب عليها عن طريق انك ممكن تاخد كورسات لغه لحد مستوى B1 وتمتحن في معهد جوتة علشان لازم شهادة من مكان معتمد ومعهد جوتة هو المكان الوحيد اللي شهادته معتمدة من السفارة في مصر وده الرابط بتاعه http://www.goethe.de/ins/eg/kai/arindex.htm
ولكن هو اسعاره غالية فممكن تاخد الكورس بره وتمتحن في جوته وتاخد منه الشهادة وبعد كده لما تيجي المانيا بتكمل كورسات اللغه وتمتحن وتبدا الجامعة عادي اهمية شهادة اللغه بتاعت جوته ان عن طريقها بتجيب زي قبول مبدأي لدراسة مثلا الطب او الهندسة عن طريق دراسة اللغه في احد معاهد الجامعة والقبول ده اللي بتسافر عن طريقه والسفارة بتديك الفيزا ودي بعض الروابط الكويسة لتعلم اللغه الالمانية وروابط ممتازة جدا وبتساعد بجد .
الرابط ده بتسجل عليه بتعمل اكونت وتبدا مستويات اللغه بالتدريج من اول A1 لحد B1 بس برضه الموقع ده مش كفاية http://deutschkurse.dw.de/…/KursPlattform…/wa/UAAuthDA/auth…
الرابط التاني ده لصفحة DW وده رابط مهم جدا ممكن عن طريقه تتابع كل اخبار المانيا وجواه هتلاقي مليون حاجة تساعد في دراسة اللغه وفي جزء مخصص لتعليم الالماني http://deutschkurse.dw.de/…/KursPlattform…/wa/UAAuthDA/auth…
اما الرابط ده فهو موقع عليه كل القواعد بتاعت اللغه الالمانية اللي في الدنيا كلها وعليه تمارين وده موقع ممتاز جدا برضو للراغبين في دراسة الالماني http://www.mein-deutschbuch.de/index.php?site=home
طبعا في مواقع تاني كتير ممكن اللي يدور هيلاقي برضه مواقع كويسة جدا وبرضوا كل المواقع دي مجانية كمان مكتبة معهد جوتة ودي موجودة في وسط البلد في التحرير وعضويتها ب 40 جنيه ممكن بالعضوية تستعير اي كتاب ودي برضوا بتساعد جدا على تعليم اللغه وعنوانها موجود على رابط معهد جوتة .
نيجي بقى للنقط التانية الشهادات المطلوبة لازم تطلع اصل سواء من الجامعة لو شهادة بالمواد اللي درستها او من مديرية التربية والتعليم لو شهادة ثانوية عامة بتاخد المستخرج ده توثقه في الجامعة او المديرية بالاختام والدمغات وتطلع بيه على الخارجية توثقه تقريبا الورقة ب 13 جنيه وبعدها تطلع بيه على مترجم معتمد من السفارة يترجمهولك ويختمهولك ويمضي عليه والرابط الجاي ده بتاع السفارة الالمانية في مصر وهتلاقي في ناحية الشمال من تحت اسماء المترجمين المعتمدين من السفارة http://www.kairo.diplo.de/ مينفعش تترجم غير عندهم وكمان عليه معلومات مهمة المهم انا شخصيا ترجمت عند استاذ اشرف احمد تاني اسم واسعاره كويسة بياخد في الورقة 90 و 80 واوقات 70 بينما عند ناس تانين الورقة ب 100 وممكن اكتر كمان المهم بعد توثيق الاوراق دي تطلع بيها على السفارة تاني توثقها من السفارة التوثيق في السفارة مجاني للطلبة تحت 26 سنة اما لو اكبر فدي حسبة تانية وبتكون ملكفة كده بقى الورق جاهز للتقديم طيب ايه الاوراق المطلوبة اصلا مبدايا شهادة ثانوية عامة كمان شهادة باي سنة درستها في مصر في الجامعة ويفضل تكون درست سنة في مصر لان الطلاب المصريين لازم يدرسو في المانيا سنة تحضيرية قبل الجامعة لان الشهادة المصرية الخاصة بالثانوية مش كفاية ويغني عن السنة التحضيرية سنة في مصر على الاقل في احد الجامعات طيب بقى الاوراق التانية اللي مش لازم تتوثق حاجة اسمها خطاب دوافع motivation letter عن اسباب السفر وده بيكون بالانجليزي او الالماني عادي وكمان صورة من الباسبور وصورتين شخصيتين دي كده كل الاوراق المطلوبة تقريبا والرابط الجاي خاص بالمنظمة اللي بتقدم مساعدات لراغبين السفر لالمانيا سواء معلومات وفي بعض الحالات منح وهي منظمة دااد http://cairo.daad.de/en/
ودي موجودة في الزمالك في القاهرة يتفضل اخر معلومة وهيا الضمان المالي وده انواع يعني ممكن تقدم للسفارة ما يثبت ان اهلك هتعهدوا بمصاريفك او ممكن شخص في المانيا يعمل ورقة بكده برضوا انه هيتكفل بمصاريفك ولكن لازم مرتبه يكون معدي 2000 يورو ومفيش اي مسائلة قانوية عليه او اي مشاكل ولكن معنديش معلومات كتير للاسف عن الطريقتين دول نيجي للطريقة الاخيرة وهي فتح حساب في بنك الماني بملبغ لا يقل عن 8040 يورو وده بيكون غالبا في بنك https://www.deutsche-bank.de/index.htm دويتشه بنك وده موال لواحده بس اللي يحتاج مساعدة او معلومات اكتر هساعده ان شاء الله كده تقريبا الموضوع خلص الحاجة الاخيرة اللي عايز انبه عليها ياريت تاخد معاد مقابلة السفارة قبلها بشهرين مثلا لان في ضغط رهيب على المواعيد وممكن تغير المعاد بعد كده بكل سهولة انا شخصيا غيرت المعاد حوالي 5 مرات تقريبا وبالنسبة لتوثيق الاوراق مش بيحتاج تحديد معاد بيكون تقريبا كل يوم الصبح بس مش فاكر المواعيد بالظبط والايام ولكن المعلومات دي موجودة على موقع السفارة .
كده انا خلصت كلامي عن الموضوع بالتوفيق للجميع اي حد عنده استفسار ممكن يسأل في كومنت وفي النهاية حابب اقول للجميع النجاح مش سهل بس مش مستحيل لازم تحلم وتحارب علشان حلمك فكر في بلدك وفي ناسك وفي اهلك وفي اصحابك وفي طعم النجاح واتعب .
الحمدلله اللي رزقني امي اللي وقفت جنبي وحاربت معايا الكل علشان اكون في المانيا في وقت كله قاللي هتفشل واتخلى عني والله يرحم والدي الدكتور سمير اللي رباني على حب العلم والوطن وقبل كل ده حب الدين والحمدلله على كل نعمه.


على لسان 

Mahmoud Abd Elhamed

هناك 3 تعليقات:

  1. المفروض فيه شروط معينة للسنة الجامعية دي

    ردحذف
  2. لو درست في حاجة وعاوز ادرس حاجة تانية ينفع ولا لا

    ردحذف
  3. هل فى مجموع معين للدخول للجامعه هناك وايه التخصصات

    ردحذف